AI Academy Asia-ийн санаачлага, Golomt Bank-ны дэмжлэгтэйгээр "AI for Women 100x100" хөтөлбөр амжилттай хэрэгжиж, хөдөө орон нутаг, Улаанбаатар хотын захын дүүргүүдийн сургуулиас ЕБС-ийн 100 эмэгтэй багш, 100 охидыг "хиймэл оюун болон код бичих ур чадвар"-ыг эзэмшүүлэх цогц сургалтанд хамруулж 2025 оны 12 сарын 06-ны өдөр хаалтын арга хэмжээгээ зохион байгууллаа.

Хөтөлбөр 9 долоо хоногийн хугацаанд онол, дадлага хосолсон байдлаар хэрэгжиж, суралцагчид хөтөлбөрийнхөө төгсгөлд сурсан мэдсэнээ ашиглан өөрсдийн бүтээсэн - хиймэл оюунд суурилсан төслөө танилцуулж, сургалтын үр дүнгээ бахархалтайгаар тэмдэглэсэн юм.

Оролцогчдын санаачлан хийсэн төслүүд нь нийгэм дэх охид, сурагчид болон багш нарын бодит асуудлыг шийдэх, тэднийг дэмжих шийдлүүд байсан нь эмэгтэйчүүдийн нийгэмд чиглэсэн үйлийг бүтээх хүсэл зориг, онцлогийг шингээсэн байсныг онцлон дурдмаар байна.
Хөтөлбөрийн үр дүнд боловсролын хүртээмж багатай сум орон нутагт мэдээллийн технологийн ахисан түвшний мэдлэг, ур чадвартай багш нар бэлтгэгдэж, мэдлэг чадвараа түгээх боломж нээгдлээ. Мөн ирээдүйд технологийн салбарт манлайлах охид маань урам зоригоор дүүрэн энэхүү хөтөлбөрийг төгслөө.

Мөн тус хөтөлбөр нь ITU (Олон Улсын Цахилгаан Холбооны Байгууллага)-ын "AI skills coalition" хиймэл оюуны боловсролыг дэмжих глобал аяны хүрээнд хэрэгжиж, Монгол улс дахь боловсролын хөтөлбөрийг олон улсад таниулаад байгаа билээ.
Хөтөлбөрийг санхүүжүүлж, охид эмэгтэйчүүдийн төлөө бодитой хувь нэмрээ оруулсан Голомт банк, хөтөлбөрийн туршид идэвх, хичээл зүтгэлтэйгээр оролцсон охид, багш нартаа гүн талархал илэрхийлэе.

Бидний нийгэмд хэрэгжүүлсэн ажлын үр өгөөж Монголын олон олон хүүхэд залууст хүрэх болтугай.

AI for Women 100x100 хөтөлбөр амжилттай хэрэгжиж, хаалтын арга хэмжээгээ зохион байгууллаа.